க.கோபி கிருஷ்ணா.

இருக்கிற கோவிலை எல்லாம் படிக்கிற பள்ளிகள் செய்வோம்...

'தமிழுக்கு அமுதென்று பேர்,
அந்த தமிழ் எங்கள் உயிருக்கு நேர்'

'யாமறிந்த மொழிகளிலே தமிழ் மொழி போல் இனிதாவதொன்றறியேன்'
இந்த இரண்டையும் சொன்ன போது நண்பனொருவன் சொன்னான் 'சிலவேளையில் பாரதிதாசனுக்கு ஆங்கிலம் தெரியாமல் இருந்திருக்கலாம் தானே? யாமறிந்த மொழிகளில் என்று தானே சொல்லியிருக்கிறார்' என்றான்.
அவனுக்கு தெரியாது பாரதிதாசன் அவர்களுக்கு தமிழ், ஆங்கிலம், சமஸ்கிருதம் உட்பட ஆறு மொழிகள் இளவயதிலேயே தெரியும்.
சரி இவ்வளவு பெருமைமிகுந்த தமிழ் மொழி தனது தூய்மைத்தன்மையை இழந்தது போன்று தற்போது காணப்படுகிறதே... ஏன்...

முதலாவது விடயம் எம் மொழியை இற்றைப்படுத்தும் செயலை நாங்கள் யாருமே செய்யவில்லை. அல்லது இற்றைப்படுத்தியதை பரவலாக்க வில்லை என்பது தான்.
'என்ர இணைய மேய்வானில் தான் ஏதோ பிழை. நான் வேற கணணிக்கு போய் தான் என்ர வலைப்பூவை இற்றைப்படுத்திற்று வந்தேன். அதோட என் வலைப்பூவிற்கு சில நல்ல பின்னூட்டல்கள் வந்திருந்திச்சு. அதோட என்ர மின்னஞ்சல் முகவரிக்கும் கனக்க அஞ்சல்களும் வந்திருந்தன' இப்படி நாங்கள் எல்லோரும் கதைக்கின்றோமா...
'என்ர இன்ரனெற் புறெளவசர்ல தான் ஏதோ பிழை (அல்லது ஏதோ அப்சற்). தான் வேற கொம்பியூட்டால போய தான் என்ர புளொக்க அப்டேற் பண்ணிற்று வந்தன். அதோட என்ர புளொக்குக்கு கொஞ்ச நல்ல கொமன்ற்ஸ்ம் வந்நிருந்திச்சு. அதோட என்ர மெயில் அட்ரசுக்கும் நிறைய மெயில் வந்திருந்தது.' இது தானே பெரும்பாலானோரின் தமிழாக உள்ளது. மேற்படி சொற்களிற்கு அழகான தமிழ் சொற்கள் இருக்கும் போது ஆங்கிலக் கலப்பு ஏன்...

இதற்து முக்கியமாக பல காரணங்களை சொல்லலாம்.
முதலாவது உலகில் தொழிநுட்பம் வளர்ந்த அளவிற்கு நாம் எங்களுடைய தமிழ் மொழியை இற்றைப்படுத்த வில்லை. இற்றைப்படுத்திய சொற்களை நாம் பயன்படுத்தவில்லை. வானொலிகள், தொலைக்காட்சிகள், பத்திரிகைகள் ஆங்கில சொற்களையே இப்போதும் பயன்னடுத்தி வருகின்றன. இன்று தொலைக்காட்சி மற்றும் வானொலி கலைஞர்களை இளைஞர்கள் திரைப்பட கதாநாயகர்கள் போன்று அதிகளவு விரும்புகிறார்கள். இக் கலைஞர்கள் தூய தமிழை கதைத்தால் அவர்களை பின்பற்றும் இளைஞர்களும் நிச்சயமாக தூய தமிழில் கதைப்பார்கள்.
அடுத்தவர்கள் திரைப்பட கதாநாயகர்கள்... முதலில் திரைப்பட மற்றும் வானொலி அறிவிப்பாளர்களை குறிப்பிட்டதன் காரணம் திரைப்பட கதாநாயகர்கள் சந்திப்பதை விட இவ் அறிவிப்பாளர்கள் மிக மிக அதிகமாக சநிதிக்கிறார்கள்.
திரைப்பட கதாநாயகர்கள் தமிழில் கதைத்துப் பார்க்கட்டுமே... தமிழ்; விரிவடையும்...
முன்பெல்லாம் தமிழ் வளர்த்த பெருமை திரைப்படங்களை சார்ந்தது. தூய தமிழை கேட்பதற்காகவே மக்கள் திரைப்படங்களை பார்க்க சென்றார்கள். இப்போது திரைப்படத்தில் சில செக்கன்கள் வரும் கதாபாத்திரம் கூட தன்னால் முடிந்தளவு ஆங்கில வார்த்தைகளை உதிர்த்து விட்டல்லவா செல்கின்றன... எதிலும் இலகுவில் 'எடுபட்டு' விடும் இளைஞர்கள் இலகுவாக தமிழை கொல்லும் முறையை அறிந்து விடுகிறார்கள்.

ஆகவே இதற்கு நாங்கள் குற்றஞ்சாட்டக் கூடியவர்கள் இன்றைய வயது முதிர்ந்த தமிழறிஞர்கள்...
அவர்கள் இளம் வயதில் தங்கள் கொள்ளை கொண்டோரை ஒன்றாக இணைத்துக் கொண்டு மேற்படி விடயங்களை கொஞ்சம் கொஞ்சமாக எதிர்த்திருந்தாலும் கூட இன்று இந்த நிலைமை இருந்திருக்காது. பட்டம் பெற்று, திருமணம் முடித்துவிட்டு, பிள்ளைகளை பெற்றுவிட்டு தான் தமிழ் வளர்க்க முயல்வதால் என்ன பிரயோசனம்...

தொலைக்காட்சிகளை பற்றி கதைக்கும் போது எனது வயது மாணவர்களிடம் காணப்படும் இன்னொரு கொள்கையை பார்த்து ஆச்சரியமடைந்தேன்...
இலங்கையிலுள்ள தொலைக்காட்சி ஒன்றின் இசைப் போட்டி ஒன்றில் அந்த அறிவிப்பாளினி ஆங்கில வார்த்தைகளை அளவுகணக்கின்றி பயன்படுத்துகிறார் என்ற குற்றச்சாட்டை நண்பனொருவனிடம் கதைக்கும் போது முன் வைத்தேன்...
அப்போது அவன் சொன்ன பதில் தான் என்னை இதை எழுத தூண்டியது...
அவன் சொன்னான்... 'இப்பிடியான புறோகிறாம்ல சத்த தமிழ்ல சதைச்சா வடிவா இருக்காது. இப்பிடி கதைச்சா தான் பார்க்க நல்லா இருக்கும். இப்பிடி கதைச்சா தான் ஸ்ரைலா இருக்கும்' என்று.
நான் அவனிடம் உடனடியாக கேட்டேன் 'அமெரிகன் ஐடல் போன்ற ஆங்கில நிகழ்ச்சிகளில் தனி ஆங்கிலத்தில் கதைத்தால் நீ சொல்கின்ற 'ஸ்ரைலா' இருக்காது என்பதற்காக "கியர் ஐ காவ் த நடுவர்களின் தீர்ப்பு. லெற் அஸ் ரேக் எ லுக் தற் கூ இஸ் கொன்னா கோ ரூ த இறுதிப் போட்டி" என்றா சொல்கிறார்கள்' என்று கேட்டேன். இதே கேள்வியைத்தான் எல்லோரிடமும் கேட்கின்றேன்... அவர்கள் தமது மொழி வளரவேண்டும் என்று நினைக்குமளவில் கொஞ்சம் கூட நாம் நினைப்பதில்லை...

இதற்கெல்லாம் காரணம் என்ன...
சுருக்காமாக சொல்வதானால்...
'வெள்ளைக்காரன் எங்கட நாட்டுக்கு வந்து செய்த பெரிய அழிவுகள் இரண்டு... முதலாவது தமிழ் ஒரு அழகற்ற மொழி;, தமிழ் கதைத்தால் மரியாதை இல்லை, ஆங்கிலம் தான் கதைப்பதற்கு ஏற்ற மொழி
இரண்டு-கறுப்பு நிறம் கூடாது. வெள்ளை நிறம் தான் மனிதரிற்கு அழகானது. என்ற இரண்டு மிகக் கொடுமையான, கேவலமான எண்ணங்களை எமது மனதில் பதித்து விட்டு சென்றது தான்.

--
க.கோபி கிருஷ்ணா.

அன்பான தமிழ் நண்பர்களே...
நலம் நலமறிய ஆவல்....
உங்களிடம் தமிழ் சம்பந்தமான உதவியொன்றை எதிர்பார்க்கின்றேன்...
தமிழில் கிறிக்கெற் சம்பந்தமான வலைப்பூவொன்றை உருவாக்கியுள்ளேன்.
கிறிக்கெற்றில் பல சொற்களுக்கு பொருத்தமான தமிழ்ப் பதம் தெரியாது திண்டாடுகிறேன்.
முதலாவதாக கிறிக்கெற் என்பதற்கு தமிழ்ப்பதம் என்ன? துடுப்பாட்டம் என்பதை பாவிக்க முடியாது எனக் கருதுகிறேன். காரணம் போலிங் என்பதற்கு பந்து வீச்சு என்றால் பற்றிங் என்பதற்கு துடுப்பாட்டம் தானே? ஆகவே பற்றிங் செய்பவரையும், கிறிக்கெற்றில் ஈடுபடுபவரையும் துடுப்பாட்ட வீரர் என்று தானே அழைக்க வேண்டி வரும்???
ஆகவே குழப்பம் தானே?
யாராவது எனக்கு கிறிக்கெற் சம்பந்தமான கலைச்சொற்களை தருவீர்களா?
நான் உருவாக்கிய வலைப்பூவில் பல ஆங்கிலச் சொற்களை கையாண்டிருக்கிறேன்.. தயவு செய்து யாராவது அவற்றிற்குரிய தமிழ் கலைச்சொற்களை தந்துதவுவீர்களா....
தயவு செய்து....
(எனது கிறிக்கெற் சம்பந்தமான வலைப்பூவின் முகவரி-www.tamilcricket.blogspot.com)


--
க.கோபி கிருஷ்ணா.

எனது அக்காவின் 6 வயது (தரம்1) மகள் தானாகவே எவரின் எந்தவித உதவியுமின்றி வரைந்த படம். நான் தரம் 11 முடிவில் தான் கணணியை பயன்படுத்த ஆரம்பித்தேன். எனவே இந்தப் படம் எனக்கு விசேடமானது.

--
க.கோபி கிருஷ்ணா.

 
•கதாநாயகியின் கணவன் அனேகமாக பணக்காரனாக இருப்பார்.

•கதாநாயகியின் கணவனோ அல்லது கதாநாயகிக்கு மிக நெருக்கமான ஒருவரோ இரண்டு மனைவிகளை கொண்டிருப்பார்.

•இடைக்கிடை வேலைக்கு செல்வார். ஆனால் ஏதோ பிரச்சினை ஏற்பட்டு வீட்டில் இருப்பார். பின்னர் தேவைப்பட்டால் வேலைக்கு செல்வார்.

•நஷ்டத்தில் ஓடிக்கொண்டிருக்கும் ஒரு நிறுவனத்திற்கு நல்ல 'புரொஜக்ற்' ஒன்றை கதாநாயகி செய்து கொடுப்பதன் மூலம் அந்த நிறுவனம் இலாபத்தில் இயங்கும். ஆனால் அந்த நிறுவனத்தில் ஏதோ காரணத்திற்காக கதாநாயகி தொடர்ந்து வேலை செய்ய மாட்டார்.

•கதாநாயகியின் வாலைப் பிடித்துக் கொண்டு அவர் சொல்வதை எல்லாம் (கதாநாயகி சொல்லும் எல்லா விடயங்களுக்கும் ஏதாவதொரு காரணம் இருக்கும்.) கேட்பதற்கு ஆண்கள் சிலர் இருப்பார்கள். அவர்கள் தான் கதாநாயகியின் பெரும் பலமாக சித்தரிக்கப்படுவர்.

•நிச்சயமாக கணவனை பிரிந்து கொஞ்ச நாட்களாவது கதாநாயகி இருப்பார்.

•எந்த காரணமும் இல்லாமல் கதாநாயகியை எதிர்ப்பதற்கு ஒரு குழு இருக்கும்.

•கதாநாயகி மணமுடித்த வீட்டில் ஒருவராவது கதாநாயகியை காரணமின்றி எதிர்ப்பார்.

•நெடுந்தொடர் முழுவதும் 'பிஸ்னஸ்' செய்தல் என்ற உரையாடல் காணப்படும்.

•ஆரம்பத்தில் தனது எதிரியை மன்னித்து திருந்த வழி விடும் கதாநாயகி பின்னர் விஸ்வரூபம் எடுப்பார்.

•நெஞ்சை உருக்கும் உரையாடல்கள் அடிக்கடி வரும்... அதற்கு பின்ணணி இசையாக ஒப்பாரி போன்ற இசை ஒலிபரப்பாகும்...

•நெடுந்தொடரின் நடுவே கதையானது கதாநாயகியை விட்டு வழுவி வேறொருவரை பிரதானமாக கொண்டு செல்லும்.

•ஆரம்பத்தில் மிக மெதுவாக நகரும் கதையில் ஏராளமான கிளைக்கதைகள் காணப்படும். புதிது புதிதாக கதாபாத்திரங்கள் வந்து சேரும்.

•தொடக்கத்தில் எவ்வளவு மெதுவாக கதை நகர்ந்தாலும் முடிவில் அசுர வேகத்தில் அனைவரும் ஒருவர் பின் ஒருவராக திருந்தி கதாநாயகியோடு நட்பு பாராட்டுவர்.

•கதை முடிவில் கிளைக்கதைகள் அனைத்தும் முடிக்கப்பட வேண்டும் என்ற கட்டாயம் இல்லை. சில கதைகள் தொக்கி நிற்கும். அந்தக் கதையின் முடிவை பார்வையாளர்கள் தாங்களாகவே தீர்மானிக்க கடப்படுவர்.

•தொடரின் முகப்புப் பாடல் இசையை D.இமான் போன்ற வண்ணத்திரை இசையமைப்பாளரே இசையமைப்பர்.

•முகப்புப் பாடலை பா.விஜய் அல்லது கவிப்பேரரசு வைரமுத்து போன்றோர் எழுதுவர். முகப்புப் பாடல் கதைக்கு சம்பந்தமாக இருத்தல் வேண்டும் என்ற கட்டாயம் இல்லை. ஆனால் தொடரின் பெயர் இடைக்கிடை பாடலின் நடுவே ஒலிக்கும்.



--
க.கோபி கிருஷ்ணா.

வணக்கம் தமிழ் நெஞ்சங்களே...
கீழே நான் தரும் ஆக்கம் இலங்கையிலுள்ள வானொலி ஒன்றின் நிகழ்ச்சிக்காக அனுப்பியது. பிரசாரம் என்ற பகுதியில் 'நான் இசையமைப்பாளரானால்...' என்ற தலைப்பில்  நகைச்சுவையாக அனுப்பியது ஆகும். இன்றைய இசையமைப்பாளர்களை கிண்டலடிப்பதாக நினைத்துக் கொண்டு அனுப்பினேன்... அப்படி இருக்கிறதா என்று நீங்கள் தான் சொல்ல வேண்டும்.
(சில ஆங்கில வார்த்தைப் பிரயோகங்களுக்கு மன்னிக்கவும். இன்றைய இசையமைப்பாளர்களின் மொழி நடையில் எழுதும் போது ஆங்கிலம் தவிர்க்க முடியாதது. எனினும் என்னால் இயன்றவரை ஆங்கிலத்தை தவிர்க்கிறேன்...)

வணக்கமுங்கோ!
நான் தான் இசையமைப்பாளர் புஷ்வநாதன்... என்ன அப்பிடி பாக்கிறியள்? மற்றாக்கள் இசையமைப்பாளர் விஷ்வநாதன் சேரின்ர பாட்டுக்கள றீ-மிக்ஸ் பண்ணி பாவிக்கேக்க நான் அட்வான்ஸா போய் அவரின்ர பெயரையே மாத்தி பாவிக்கிறன்... எப்பிடி என்ர திறமை...
சரி நீங்க என்னட்ட கேக்கலாம் இசையமைப்பாளரா வர்றதுக்கு எனக்கு என்ன தகுதி இருக்கெண்டு...
நான் சொல்றன்...
என்னட்ட பழைய பாட்டு சீ.டி எக்கச்சக்கமா கிடக்குது, அதோட 5, 6 றீ-மிக்ஸ் சொப்ற்வெயாரும் கிடக்குது. இத விட வேற என்ன தகுதி வேணும் இசையமைப்பாளராக? ஆ?
சரி நான் எப்பிடி பாட்டுகள உருவாக்குவன் எண்டு உங்களுக்கு சொல்றன்...
முதல்ல அந்தக்காலத்தில பிரபலமான பாட்டுக்கள தெரிவு செய்வன்... தெரிவு செய்து போட்டு அந்தப் பாட்டின்ர வேகத்த கூட்டுவன்... தேவையெண்டா அந்தப் பாட்ட இண்டைய 'ட்ரெண்ட்'ற்கு ஏத்த மாதிரி மாத்திறதுக்கு நம்மட வைரமுத்து சேர் உதவி செய்வாருங்கோ...
ஆனா அது மட்டும் காணாது...
பாட்டு வரிகளுக்கு இடையில இங்கிலீசு சொல்லுகள கண்ட மாதிரி போட்டு, அது கெட்ட வார்த்தையா இருந்தா நல்லம், அத றப் எண்ட பெயரில கத்துறதுக்கு, ஐயோ! சொறி சொறி... றப் எண்ட பெயரில பாடுறதுக்கு கழுதைக்குரலோட, ஐயோ! சொறி சொறி... கவிதைக் குரலோட நிறையப் பேர் இருக்கினம். அவய விட்டு கத்த விட்டு உங்களுக்கு சூப்பர் டூப்பர் கிற் பாட்டுகள தருவனேன்று உங்களிடம் உறுதியளிக்கிறன்.
நன்றி சுணக்கம்... ஐயோ மன்னிச்சுக் கொள்ளுங்கோ... பாட்டுகள றீ-மிக்ஸ் பண்ணி பண்ணி இப்ப தமிழ் சொல்லுகளயும் மாத்திறன் போல கிடக்கு...
நன்றி வணக்கம்....

இதை விட அதிகமாக எழுதியதாக ஞாபகம். ஆனால் எழுதி 2 மாதங்களுக்கு மேலே. ஞாபகம் இருப்பது இவ்வளவும் தான்.

நான் நினைத்ததை செய்துள்ளேனா?
ஜேம்ஸ் வசந்த் போன்றவர்களின் 'கண்கள் இரண்டால்...' போன்ற பாடல்கள் தமிழ் இசைக்கு பலமாக தெரிகிறது என்பதை நான் ஒத்துக் கொள்கிறேன்...
நான் நினைக்கிறேன் 'நியூ' திரைப்படத்தில் 'தொட்டால் பூ மலரும்...' பாடல் மட்டுமே விதிவிலக்காக மீள் கலவை அல்லது மீள் உருவாக்கம் செய்யப்பட்ட பாடல்களில் தமிழை அழிக்காது தமிழை மூச்சாக நினைப்பவர்களையும் கவர்ந்தது என்று.
தமிழில் படப்பெயரை வைத்து விட்டு பாடல்களில் ஆங்கிலச் சொற்களை போட்டு குழப்பியடித்தால் என்ன நியாயம் என்று தெரியவில்லை...
இன்றைய பாடலாசிரியர்கள், இசையமைப்பாளர்கள் தங்களுக்குள்ள ஆங்கிலப் புலமையை காட்ட விரும்பின் அவர்கள் ஆங்கிலப் பாடல்களையே உருவாக்கலாமே...?
சிறிது காலத்துக்கு முன்னர் நிகழ்ச்சி ஒன்றிலே பாடலாசிரியர் ஒருவர் 'நாங்கள் எழுதும் வர்த்தக ரீதியிலான பாடல்களை மட்டும் பார்க்காதீர்கள். அவை வியாபார நோக்கத்திற்காக எழுதப்பட்டவை. நாங்கள் எழுதும் கவிதைகளுக்கு நாங்கள் தான் ராஜாக்கள். அவற்றைப் பாருங்கள்' என்றார்.
தமிழை அழித்துத் தான் பணத்தைப் பெற வேண்டுமென்றால் அந்தப் பணம் எதற்கு???
அவர்களின் செயலை விளங்கப் படுத்த சில காலங்களுக்கு முன்னர் இணையத்தில் உலாவிக்கொண்டிருந்த போது எங்கோ ஒரு செய்தி இணையத்தளத்தில் படித்த செய்தி தான் ஞாபகம் வருகிறது....
'ஒரு திருமணமான பெண் அலுவலகமொன்றிலே வேலை புரிந்து வந்தாளாம்.. அவளுக்கு மேலே இருக்கும் உயரதிகாரிகள் மோசமானவர்கள். பெண் பித்து பிடித்தவர்கள். அவர்கள் அந்தப் பெண்ணிடம் சொன்னார்களாம், எங்களுக்கு நீ 'அந்த' விதத்தில் ஒத்துழைத்தால் உனக்கு வேலை உயர்வு தருகிறோம் என்று. அந்தப் பெண்ணும் அப்படியே செய்த வேலை உயர்வு பெற்றாளாம். ஆனால் அந்தப் பெண் வீட்டில் கணவனோடு அன்பாகத் தான் இருந்தாளாம்.
எனினும் இப்பெண்ணின் செய்கையை அறிந்த கணவன் அவளது கணவன் அந்தப் பெண்ணை வெட்டிக் கொன்றானாம். அவனுக்கு ஆயுள் தண்டனையும் விதிக்கப்பட்டதாம்.
அந்தப் பெண்ணிற்கும் இந்தக் கவிஞர்களுக்குமிடையில் என்ன வித்தியாசம்???

பெண்கள் அப்படி பதவி உயர்வு பெறுவார்கள் என்று நான் சொல்லவில்லை.
பெண் சகோதரிகளை தவறாக எண்ணி சொல்லவில்லை...
விதிவிலக்கான கதாபாத்திரத்தை இடைநடுவே செருகியதற்கு மன்னிக்கவும்.


இதில் கொடுமை என்னவென்றால் இப்படி எல்லாம் பாடல் எழுதிவிட்டு 'தமிழ் வாழ வேண்டும், தமிழை சரியாக உச்சரியுங்கள், தமிழர்கள் தமிழ் பேச வேண்டும்' என்று வாய் கூசாமல் சொல்லித் திரிகிறார்கள்.
இன்றைய கவிஞர்கள் முன்பிருந்த கவிஞர்களை விட எல்லாம் புத்திசாலிகள். ஏனென்றால் பிரம்மனுக்கு 'மூட்' வந்ததையெல்லாம் கண்டுபிடிக்கும் திறமைவாய்ந்தவர்கள். (பிரம்மனுக்கு மூடு உன்ன படச்சிற்றான், அடி காமனுக்கு மூடு வந்து என்ன அனுப்பிற்றான்.).
ஆனால் தமிழ்த்தாய் அழுவதை மட்டும் இன்னும் கண்டு கொள்ளவே இல்லை...



--
க.கோபி கிருஷ்ணா.